日本女星石原聰美近年主演劇集都有唔錯成績，可惜其主演NTV電視台劇《高嶺之花》，播出以來收視麻麻，大結局一集錄得11.4%收視，已經係成績最好嘅一集，而劇集煞科宴就於上周三於原宿舉行。

據雜誌《女性SEVEN》報道，石原聰美一直想同野島伸司合作，可惜以前經驗唔夠，直至《高嶺之花》野島伸司主動提出合作，石原聰美原本都好開心，可惜劇集收視遠遜預期，令佢好失望，喺煞科宴上，石原聰美發言講足10分鐘，將責任歸咎於自己，更一度爆喊。

報道亦指，石原聰美心情低落另一個原因，係同期日劇以同門女星綾瀨遙主演劇《繼母與女兒的藍調》成績最好，綾瀨遙成名作《在世界中心呼喚愛》原本由石原聰美來演，因為石原聰美因工作唔可以剃光頭，機會落咗喺綾瀨遙手上，自此佢都好後悔，現時劇集再慘敗令石原更加唔開心。

精選娛聞，喺晒《娛果》
http://fb.com/appledailyent