ViuTVV真人騷《Good Night Show全民造星》幾位評判蕭定一、張建聲及節目導演兼監製嘅吳漢邦，近日被網民批評俾參賽者嘅評語「廢到一個點」。出名狠辣嘅節目監製花姐今日回覆《蘋果》時就有啲收火，但言語間亦暗寸評判嘅評審準則。

花姐話：「我嘅回應已經喺節目中講晒（新聞連結： https://bit.ly/2MRvpFg ），我諗當時大家對評判嘅定義唔係好同，佢評審嗰件事，大家角度唔係好同，後來劉美君導師出去解釋番之後，大家就明晒，所以後半場係冇事嘅。」

不過，導師劉美君亦有質疑係節目嘅設計情節，花姐立即否認﹕「如果我要咁設計情節，我一定俾老闆斬死喇！我點會夠膽搵人哋公司嘅老闆嚟玩呀？佢哋（蕭定一公司HMV數碼中國集團）只做兩集，係40去30強呢一round。」

是否有贊助，所以可以出鏡？花姐解釋﹕「唔係，只係搵幾間公司去support我哋，佢哋參與選啲星出嚟，環球、HMV數碼中國集團、太陽娛樂輪流做評判，咁佢哋公司，如喺喺我哋呢班參賽者中搵到覺得有潛質嘅人，未來再同我哋合作，咁一齊去簽呢個人就係後話，將來係點無人知，但現在未有呢件事發生。」

至於被評個名太普通嘅涂心業（Oscar），喺台上嘅天然呆樣十足馬國明，佢話﹕「又唔係好愕然，但預期comment係同表演有關，但作為一個表演者，係一個好好機會take唔同問題，學習點樣回應。」

據當晚有喺現場錄影的人士向《蘋果》透露，參賽者當中三、四位叫Oscar，有些更為此改咗名，所以蕭定一才有此一問，其實佢錄影時係有對參賽者給予意見，但喺ViuTV官方fb呢條花絮片就唔見。

精選娛聞，喺晒《娛果》 http://fb.com/appledailyent