【有苦自己知】陳偉成髮型屋撞正惡疫開業 李妮鄧洢玲齊倒貼保店
陳偉成髮型屋美容院按摩店李妮鄧洢玲武漢肺炎
武漢肺炎擴散不受控,病菌無形,抗疫必須杜絕親密接觸,這惡疫重創各行各業,服務性行業尤其首當其衝。不少人再貪靚,近日都避免去剪髮、做facial和揼骨,所以髮型屋、美容院和按摩店的生意肯定大受影響,圈中有不少藝人經營相關店舖,陳偉成(Avis)港九擁有6間髮型屋和3間健身室、亞姐李妮在尖沙嘴開美容院、鄧洢玲(阿旦)則在銅鑼灣開樓上按摩店,他們聞疫色變。
Avis的多間髮型屋和健身室在這兩個月因蝕本要「倒貼」,他位於北角的髮型屋還是2月才開業,「因為一早plan好,店舖簽晒約唔縮得,舊年有逆權運動,今年有肺炎,呢幾年間創業嘅人好辛苦,好影響。」Avis這幾年一直有計劃,就是每年同步開一間健身室和髮型屋,人算不如天算,他說:「而家唔敢再plan住,經過呢半年真係要停一停,做好手頭各店,穩定咗生意先再諗。今年守得住好緊要,如間間都蝕錢就好難守得住,最慘唔係自己,仲有一班員工,每間都有十個八個員工,我唔會話因疫情炒咗佢哋,變咗大家要辛苦啲,共渡時艱。」
Avis的北角髮型屋斥資7位數字,農曆新年後才開張,跟疫巿撞到正,他說:「呢間店肯定會辛苦啲,可能守耐啲,呢半年、一年冇錢賺,我會團結成team捱落去。」Avis很緊張每間舖頭的防疫,「我早年都開髮型屋,我第一間店經歷過沙士,會叫員工做好啲清潔消毒,每剪完一個客會抹枱凳鏡,又用消毒藥水噴鉸剪,客人其實可以全程戴口罩整頭。」其實疫情嚴峻都或許沒心情去理髮,Avis說:「好多人客見疫情勁忍住唔剪,我哋生意跌咗六、七成。」Avis立即計數開源節流:「好多大業主企硬唔肯減,我銅鑼灣健身室嗰間係細業主,佢就好體諒免我一個月租,我哋同時又要為保障客人大量搜購防疫產品,每間舖每個月都多咗5位(數)額外開支。」
這大半年間,逆權運動後又遇上肺炎,生意雪上加霜,Avis都不想把負擔轉嫁給員工,「我冇扣員工人工,team work嘛,扣佢哋都會唔開心,本身疫情大家都已經唔開心,髮型屋過完年生意會靜少少,髮型師多數會清假,疫情最多蝕一、兩個月,齊心努力,之後賺番囉。」Avis還照顧員工心理質素,他每周都會到店中分配防疫物資,同時也給員工鼓勵。
前亞姐李妮退出幕前,於2013年在尖沙嘴經營美容店,開業7年一直以熟客居多,但疫情令大家保持距離,生意下滑三成,為了減少交叉感染風險和精簡人手,「我哋店有三間美容房,每日都盡量唔會book咁密,每位嚟做facial客人,我哋都會問吓佢近日去過乜嘢地方。店中每日安排一個美容師返嚟為預約客人服務,員工彈性上班唔使扣人工同假期,維持一切運作正常,員工士氣好緊要,舖頭需要佢哋,家庭都需要佢哋,我盡量唔想有乜嘢改動。」李妮又貼心為顧客和商場清潔工人送上口罩,為減省成本,李妮指已聯絡商場業主商量減租事宜,有待對方回覆。
對比Avis和李妮,阿旦的生意經驗算最少,她3年前跟女友人在銅鑼灣開上樓按摩店,「生意慢慢上咗軌道,儲咗一班熟客,我哋生意有四成係遊客,但去年逆權運動,下面港鐵封站,成個銅鑼灣烽煙四起,條街冇人,嗰時我哋寫咗封信畀業主,嘗試同佢商量減租,業主係一位90歲伯伯,佢好體諒,去年10月開始減我哋兩成租金,而家又爆肺炎,生意起碼跌咗七成,我哋近日膽粗粗又寫信畀業主,等佢回覆,租務部嗰邊話計計數先,成幢大廈好多租戶,希望有好消息。」
阿旦大嘆過去幾個月生意不穩定已蝕入肉,「呢兩波浪好刺激,原本按摩店租約到今年年尾,我會尊重合約精神,呢刻都想繼續撐埋落去,set up開店到而家,我哋花咗好多心血,捱過好多先做到咁嘅成績,慶幸開店一年半回咗本,而家嘔番啲出嚟,我唔想放棄。」阿旦預計這段時間有機會仍要蝕錢,所以她近日開始在店中發售防疫產品幫補收入。阿旦強調店中做足防疫,客人用的毛巾都會放紫外光燈櫃消毒。
-----------------------------
第三屆最港電影大獎
按此立即投票 -----------------------------
Avis的多間髮型屋和健身室,這兩個月因疫情嚴峻要蝕本。