張敬軒嘅《降兩度演唱會》今晚已經係最後一場喇，噚晚去睇嘅嘉賓就有容祖兒、蔡卓妍、吳浩康、許廷鏗、樂易玲、林志美、薛家燕等，嘉賓就請咗丁太楊千嬅。

千嬅甫升上台，同軒仔合唱《可惜我是水瓶座》，觀眾一聽音樂已經興奮萬分，反應非常熱烈，兩人唱完歌，降兩度(軒仔) 馬上同千嬅姐打招呼，並且告訴千嬅，為了迎接她，把頭髮都染了紫色：「你睇下我個頭髮，特登為你做㗎！你係紫色頭髮始祖嘛！你係天后你教吓我呢啲後輩……」

千嬅笑住話：「咁我咪即係你祖先？我呢啲下面升上來，點會重係天后，我已經變咗娘娘喇。大家都係水瓶座，我大你一個圈，我估我做得你阿媽喎！」軒仔就好搞笑問千嬅！「咁邊個係我阿爹？」千嬅狂笑：「冇㗎，你睇我就知係單性繁殖你㗎啦，所以你咪似青蛙囉。哈哈……」

之後千嬅接住話：「見到你今日咁努力，上台唔係容易嘅事，無論有幾多經驗都好，重要好有堅持先得，你做到咗喇！做到一個令人感動的騷！」軒仔回應：「係呀，我真係好有堅持，日日堅持番去剃腳毛……我唔介意俾你摸吓！」

摸完大腿後，千嬅就話：「聽講你昨日有個好震憾嘉賓喎！」「車，唔關我事，係個個張敬軒請，關智斌嗰啲，濕濕碎啦！」沒料到千嬅竟然問:「咁你幾時會嫁？唔係，我幾時有個女婿？定係娶新抱？但係你o依家咁樣，真係唔係好得喎，你要執執先，執完番上嚟就有姻緣㗎喇。」

聽到嗌「結婚」，觀眾即時起哄，軒仔就話：「原來我今日係求姻緣，哎，我快啲落番去執下先。」跟住千嬅就自己獨唱《再見二丁目》，等軒仔大變身。

精選娛聞，喺晒《娛果》
http://fb.com/appledailyent