吳若希上年宣佈有喜，仲同未婚男友Alex越嚟越恩愛，嚟緊今個月尾就到預產期，已經幫囡囡諗定名叫Giselle，係星夢娛樂繼鍾嘉欣之後，又一位新任媽媽。

講起呢班星夢幫，過去呢年都可以話喜事連連，皆因鍾嘉欣15年底結婚、16年誕女，緊接吳若希又宣佈有喜，再到今個月初鄭俊弘仲同何雁詩一齊認拍拖，洋溢住一片溫馨。

不過咁，鄭俊弘承認拍拖嘅同時，與未婚妻嘅關係仍然含糊，有傳因鄭俊弘形象插水，星夢決定先放佢入雪櫃。至於原本留俾鄭俊弘嘅7月紅館檔期，就要搵人接手。

話晒紅館係香港歌手嘅指標，噚日有傳呢個機會交咗俾吳若希！計番條數，吳若希月底生得，休息一個月，7月先開騷，即係仲有大約一個月時間俾佢收身。

空穴來風，就未必無因嘅。吳若希雖然陀住B女，但仲會抽空返公司搵星夢高層何哲圖吹水，日前何哲圖被發現喺旺角街頭欷歔煲煙，吳若希都衝出嚟護駕，認衰話係自己返咗公司呃水吹，先搞到何哲圖搭唔到的士走（新聞連結： http://bit.ly/2oTrJo7 ），咁識做，有機會梗係留俾有準備嘅人啦。