受傷做乜好？與其喺英國度hea，不如去美國拜訪吓大師級人馬啦！曼城嘅「耶穌仔」加比爾捷西斯同埋根度簡因傷缺陣，過去周末冇份幫球隊比賽，就飛咗去美國嘅紐約，同紐約城嘅中場大師派路見面。

曼城嘅德國中場根度簡膝部重傷收「咧」，而巴西前鋒「耶穌仔」加比爾捷西斯就蹠骨骨裂，有少少機會可能喺季尾出得番。雖然受傷踢唔到波，但行走吓路就冇問題嘅，「耶穌仔」上禮拜六就撐住拐杖，同根度簡一齊過去紐約，探訪曼城嘅姐妹球會紐約城。喺紐約城，最吸引呢兩位球星嘅，當然中場大師派路啦。「耶穌仔」同根度簡爭住同派路合照，佢哋之後仲將相放上社交網站。見到兩位球壇後輩咁有心，唔知派路會唔會教番佢哋兩招呢？除咗派路外，根簡度仲成功「捕獲」踢緊紐約城嘅前巴塞隆拿射手韋拿。