林雅詩媽媽兒子滯留英國 憂慮非公民患病冇保障：只能自己救自己
蘋果日報 2020/12/25 00:21
林雅詩兒子英國
（相片由受訪者提供）
單親媽媽林雅詩（Grace)早年安排15歲的囝囝到英國讀書，但最近英國發現變種武漢肺炎，並已開始封城，林雅詩今日接受《蘋果》電話訪問時直言非常擔心，她說：「佢哋嗰邊開始放聖誕假，學校宿舍已經冇晒人，好彩我媽咪都有去嗰邊陪阿仔，但疫情停晒啲航班，都唔能夠飛返香港。」她透露媽媽和囝囝在英國南部生活，跟疫情重災區倫敦相距較遠，可以應需要出外購買日用品，但超級市場的食物很快便被搶購一空，她說：「佢哋噚日趕緊出去買，但貨架全部都清空晒，預計食物只能維持幾日，希望超市會盡快補貨。」
除了食物和日用品，林雅詩更擔心是醫療問題，她續說：「因為佢哋唔係英國公民，所以touch wood如果有咩事，係冇實際嘅醫療可以幫忙，只能自己救自己。而當地嘅醫務診所都冇開，去藥房又買唔到適當藥物，因為即使冇疫情，我想去買粒退燒止痛藥都買唔到，現在變種疫情，就更加唔知咩環境。」受疫情打擊，Grace在娛樂圈已經有一段時間沒有工作，早前轉職做OL，但她透露已辭工：「原本一路都OK，我嘅男上司對我好好，經常都有讚我工作表現，但再上面嘅女上司就比較麻煩，我真係頂唔順啲辦公室政治，handle唔到。」問到可擔心經濟出現問題？她說：「驚㗎，依家市道咁差，其實大陸都有啲工作搵我，但我未ready要隔離14日，所以都會盡力再搵其他工作。」
林雅詩的兒子滯留英國南部，超市早被搶購一空。（受訪者提供圖片）
林雅詩受不住辦公室政治，早前辭去OL工作。（受訪者提供圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！