【信里一城】一單永世難忘的「床X交易」（小師兄）
蘋果日報 2020/09/09 19:42
信里一城小師兄地產
蘋果日報
我做經紀廿幾年，有咩「床單」未聽過，但有一張單，我想起都……
那些年我招兵買馬，有手有腳已是我杯茶，當年才25歲的下屬A，身高6呎、貌似台灣男星柯震東，樣子如何我不介意，完全因為講起錢，他雙眼發光。有天一個客人walk-in約睇樓。當時下屬A是新人，睇樓期間我循例都打電話問睇成點，他只回覆：「唔傾住。」我估白做啦！到他返公司，只說客人無厘頭。
以為此刁不成，數天後該客人竟致電相約下屬A翻睇同一單位，當時我興奮地跟他說：「掂呀！」怎料平時熱情健談的他竟冷淡地說：「哦！」接着說：「可唔可以陪我一齊去。」作為上司，又有單開，我怎會拒絕。客人相約晚上7時，大廈閘前等，迎面而來是一位年約50歲大叔，身穿緊身紅色上衣、黑色窄身皮褲，油頭粉面之餘，左耳還戴著不知是真是假的鑽石耳環。係，當時的我，和現在讀者的你都估到甚麼事。大叔全程無望過我，對下屬A虎眼眈眈 ，上樓才看幾分鐘，就話睇完不如去飲杯嘢，都未答，又話不如打桌球，而又巧合地，在睇緊的樓盤附近一幢商廈有一私竇是他朋友所有，有嘢飲又有桌球打。在接受n年客人永遠是對的訓練下，我極速say yes。
10分鐘路程上到私竇，我後悔了！中年大叔說教下屬A開波，接着像連體嬰，大叔黑色皮褲緊貼下屬A下半身，又捉住他手要調教姿勢。那刻，我爆了，是怒火，一手拉走下屬A，一邊說聽朝單交易未搞掂，秒速奪門絕塵而去。事後下屬A和盤托出：「大佬，我怕你笑。呢條X佬，晚晚11點打嚟煩X住我。」我話：「你唔早講，就算佢係實客，我哋都唔使做佢生意。」
大叔有無幫襯？有，700幾萬買入一伙，畀足佣，下屬A淨袋4萬幾。如果男女那種叫「床單交易」，咁呢啲可能叫「床蛋交易」。
小師兄
-----------------------------
【全球樓行】 Dream House零距離
屬於香港人的移民攻略
-----------------------------
上車必讀天書 「九成按」入市懶人包
點擊即睇《按揭必讀手冊》電子書
-----------------------------
《蘋果》英文版免費試睇：了解更多