梁朝偉和張榕容日前於黃埔宣傳新戲《擺渡人》，電影設有三個愛情故事，分別是偉仔與杜鵑，金城武與張榕容及陳奕迅和熊黛林。杜鵑身形高䠷，偉仔坦言拍攝時需要企木箱遷就高度，感覺麻煩，不過依然享受拍喜劇的過程，他說：「唔想拍劇情片，因為太沉重，拍完《一代宗師》之後，想拍喜劇，會開心啲。」他自言每個人也有童真及嚴肅一面，自己在朋友及太太劉嘉玲面前都有搞鬼一面。至於張榕容則與金城武有段微妙愛情，她說：「我煮的餃子非常難吃，只有他一人欣賞。故事說我倆很開心，搞笑而親密，但沒有親熱。」

Eason被摸大髀

另外，偉仔和陳奕迅（Eason）日前接受有線訪問，分享拍攝趣事。偉仔在戲中飾演酒吧老闆，專為人解決情緒問題，他笑說：「最妙係王家衛叫我演得吊兒郎當啲，畀人唔知係咪真嘅感覺，非一般正經輔導員。」偉仔今次更會開金口演唱主題曲，他笑言：「初時我話唔係啩！但王家衛叫我參與吓，咁好啦。」
提到和Eason首次合作，偉仔大讚對方演出夠真誠：「我除咗鍾意聽Eason嘅歌，佢嘅戲亦有睇，覺得佢做戲好真誠。」對此Eason大感興奮說：「可以同偶像合作真係好開心，偉仔只要做自己已經影響到我，我可以吸收好多有用嘅方向。」導演張嘉佳早前曾表示將自己最喜歡的演員都放在此戲中，Eason大爆對方初次見面已相當熱情：「佢係咁摸我大髀，我心諗第一次見面咋！」
採訪：張俊銘