潘頓跑完頭四場，揸住「名駒」、「精彩時機」兩win，原本領先騎師王，但雷神唔放過佢，第三場騎大熱門葉廐「勝在煌」，大外欄一陣風飛將軍從天而降，神乎其技衝贏後，到第五場四班1400米，佢幾乎以同一跑法對待亦係大熱之姚廐馬「奮鬥雄心」，成功起孖。
過去只曾四戰取一冠兩季之四歲質新分子「奮鬥雄心」，原本係後備，但告廐蔣嘉琦座騎「包裝精銳」排位後突然退役，「奮鬥雄心」得以後備補出，更撞啱雷神同場罕有地冇座騎，人馬於是連續第二仗並肩作戰。結果「奮鬥雄心」半條直路從大外欄如飛殺上，連追八九匹馬，冚過晒所有內叠馬，3.5倍大熱勝出。
連同「奮鬥雄心」，姚本輝馬房季內暫得五win，清一色於沙田日賽草地交出。原本呢場好有機會開埋大熱Q，不過啡燈落重飛之次熱門「有鬥志」於潘頓胯下拉士一步，頂唔住一對馬「奮鬥雄心」及「信心出擊」之衝刺只得第三，「信心出擊」13倍跑第二，第四名係24倍冷門「好友益」，四重彩派近四萬五千元。