講到九龍凱悅酒店，點可以唔提Hugo's。呢間餐廳嘅燒牛肉同龍蝦湯係好多人嘅味覺回憶，佢哋每月賣2.5噸牛肉，重有sidecooking，一樣好得客人歡心。
除咗牛肉以外，Hugo's嘅蛋糕都好掂，36年為賓客慶祝用的蛋糕不計其數，蛋都用咗25萬隻。有熟客同華華講，Hugo's係求婚嘅好地方，好多男仔同餐廳員工夾計，將隻戒指收埋喺甜品下面，食完甜品就發現，成功率又點會唔高呢！
Hugo's亦見證咗本城的繁盛，嘉禾老闆鄒文懷同李小龍第一次見面傾合作拍片就係喺呢度。因為多熟客，個招牌夠響，所以就算成間酒店要拆，凱悅都會保留Hugo's，包括餐廳內所有裝飾，甚至地面鋪設嘅長木地板都會撬起收埋，等第日重開時，保存番原來風貌，但各位王老五想喺度求婚，睇怕最快都要07年。