陳鍵鋒、陳冠希（Edison）、袁彩雲及許誠毅前晚在銅鑼灣出席電影《史力加3》（ShrektheThird）的首映禮。陳鍵鋒有份主演的電視劇《學警出更》上周收視並不理想，平均收視下跌至28點，僅得181萬觀眾收看。

陳鍵鋒被問到收視差強人意，他笑笑口說：「唔知呢，需要時間去消化，嚟緊會好啲，因為行咇係日常生活，嚟緊講入營訓練會緊張啲。」問到收視是否因郭羨妮與陶大宇的緋聞拖垮？陳鍵鋒聞言陰陰嘴說：「個問題咁難答嘅，其實未致於咁嚴重，觀眾要分清角色同個人本身，咁樣睇套劇會好啲，演員付出好大努力，人哋家事唔好理咁多。」

另一邊廂，有份為《史力加3》配音的陳冠希，他稱已在美國率先欣賞該戲，並十分喜歡。問他是否因為跟女朋友楊永晴（Vincy）一齊睇，故此特別喜愛，Edison笑說：「唔知係咪，我係覺得套戲好睇。」
提到早前Edison跟英皇的紛爭，問他有否收到律師信，他說：「我自己冇收到，但經理人公司收到，成件事我覺得係一個誤會，我廣東話得7、8成，國語就得5、6成，係字眼上誤會。我完全尊重楊受成，我唔會講呢啲嘢，希望佢明白，件事完咗㗎喇，佢冇追究，我都冇追究。」他表示事件發生後，已第一時間致電楊受成解釋。問他可有搵女友Vincy幫手做說客，Edison說：「唔關佢事，係我同楊生個人誤會。」
那麼日後可會小心說話，Edison稱：「大家知我講嘢冇保留，如果我講到咁衰，值得報道，我冇做過，唔公平，我尊重楊生同英皇，件事兩、三個星期前已解決，大家應該忘記。」
採訪：魯萍
攝影：仇志德