袁詠儀(靚靚)、蘇永康同蔡一智等，今日去到油塘出席由張玉珊舉辦嘅「愛心送暖迎中秋」，今日靚靚個妝化得特別靚，連老公Chilam都讚佢，靚靚話：「佢o氹我啫，基本上佢成日讚我嘅，但我唔識分佢講真定講笑。」問佢係咪成日畀兩父子蝦？靚靚話：「都可以話係蝦嘅，佢哋夾埋嘅話我就冇嘢好講，兩父子好搞笑好夾，我有時勞氣到想出手，不過諗諗吓就算啦！好似得我一個咁認真咁。」

靚靚老友郭富城榮升爸爸，問靚靚送咩禮物畀城城嘅小公主？佢就話會夾埋其他老友一齊打個金牌，問佢會唔會上契當正自己個女？靚靚就話：「我唔拘呀，佢唔得閒我可以幫手湊，我好鍾意湊BB，佢肯我就肯。」

至於有冇見過小公主？靚靚話：「未有機會，佢生咗有通知我哋，我生過，新媽媽唔好擾亂，過一頭半個月先。到我哋想去嘅時候阿王就去咗拍戲，唔通自己踩上去咩！同佢太太唔係熟到咁。」靚靚仲話城城變得黐家，佢話：「阿王真係唔見咗！佢以前就識得話我哋，o依家呢刻衰嘢自己就咁，佢係好嗲嗰啲嚟，畀一排佢做爹哋湊BB嘅生活。」

另外，蘇永康因為凌晨追睇自己有份演嘅《壹號皇庭II》，搞到黑眼圈，佢仲話好開心廿幾年前嘅戲喺深夜時段再播，仲計過可以吸引到13個高質嘅廣告客，好開心大台賺到錢，仲係冇本生利。身旁嘅張玉珊就八卦問佢戲入面同王菲拍拖嘅感覺？蘇康就笑話：「美女與野獸。」嚟緊蘇康會同太太二人世界去歐洲8日，第一次離開囝囝咁耐，問佢會唔會趁機造人？佢就話：「冇呢個打算，好好將個仔教好就得。」而張玉珊就話都有睇返自己有份演嘅《妙手仁心》，笑言見到就暈，仲話：「我唔係食呢行飯嘅，間唔時都有人搵我拍嘢，不過我生活低調啲，大部份時間做慈善。」