噚晚先講完個市大跌之後，一個月會彈番過千點，點知唔使等太耐，今日最多升400點，收市都升286點報23654點。噚日講過，跌幅大無一致性原因，今日反彈亦都係，最多只可以話A股升香港跟機，而大陸評論對A股升3%以上亦都冇一致結論。

發生呢種事，只可以話A股化已經完美接軌，升跌已經唔需要有咩原因。

暫時假設係減息利好個市，即係習總班子上任以來咁多改革，第一次有一樣嘢係實際有成效，而唔係統一口徑咁話「改革短線陣痛、長線有利」，然後長線到年復一年都未見有利。

第一劑有效，多數會執多劑。因為美國QE已經證實有效，至少喺股市上有效；而日本QE、貨幣貶值亦都對股市有效。

對股市有效，喺其他政權會帶嚟批評。但係一來中國評論一定會被河蟹，最後中央都係英明神武；二來中國人天生賭性強，A股有85%散戶，好多仲等返家鄉。本欄相信，冇乜中國人對新經濟有興趣，但相信至少一半中國股民對新經濟股有興趣，更加相信「絕大多數」中國人對A股返家鄉有興趣。

減息對A股有咁大刺激，習總班子根本無須搞乜經濟改革建立功績，只須減息甚至暗渡陳倉QE。如果谷到A股重上6000點，對中國人嚟講，功績仲大過幫中國經濟轉型。到時股市旺有財富效應，好多問題都會解決，其他「改革乜乜乜」咪當順手做吓囉！

至於係咪「輪到中國QE」？本欄當然唔知道，但繼續減息應冇懸念。暫時本欄未係A股大好友，但相信炒到再減息應不夢。

高明

神奇‧頂級‧超卓，盡在偶像派財演高明Facebook專頁：
https://www.facebook.com/BigRiceTea