當年今日
關於我們

  林瑞麟介紹新班子 - 李八方

蘋果日報 2003/10/03 00:00


政制事務局局長林瑞麟成日俾卿姐追住佢話佢冇嘢做,不如執咗佢個局。林局長梗係唔制。佢噚日重特登喺外國記者會請八方同各行家食晏,介紹佢新班底畀大家識。
當中最出名當然係阿松嘅前新聞秘書譚志源,佢做咗政制事務局嘅助理秘書長,咁當然就冇以前咁出風頭周街走。譚志源笑話自己因為日日坐喺政府總部,閉門練功肥咗十磅。
另一個新嘅副秘書長雷潔玉以前係契媽李麗娟嘅手下「四朵金花」之一,佢專門負責對內地及對外以至所謂台灣問題。不過,台灣問題連葉國華都拆唔掂,潔身如玉嘅雷小姐小心政治地雷呀。
要搵人講政制改革,就要搵另一個副秘書長黎以德,呢瓣屬於佢負責。當然最高負責人係林D9。大家都問D9驚唔驚唔夠時間做政制檢討?佢死都話冇問題,直選喎,重有三年零九個月。葉劉前車可鑑,林D9如果唔想提早陪女去美國留學深造,就要醒定啲。


傳真︰2623-9278
電郵︰[email protected]