麥明詩、王君馨、梁烈唯、黃智賢同關禮傑等，今日出席新劇《是咁的，法官閣下》開鏡儀式。麥明詩最近箍牙，導致講嘢漏風，不過佢已逐漸適應，情況有改善，佢又話o依家面型瘦咗，比前上鏡，仲笑言雖然箍牙有啲唔舒服，不過唔影響濕吻，更誇張話想同劇中嘅拍檔王君馨演女女接吻。

同場嘅梁烈唯自爆上年聖誕節前夕，去馬來西亞登台打碟，最初對方就俾咗收據，證明出騷錢已經俾咗，最後唯唯先知原來嗰個人並冇過數，被拖騷錢，唯唯冇透露實際金額，只係話約損失咗囡囡一年嘅學費，唯唯又直言公開呢件事，除咗想對方俾番應得嘅酬勞之外，希望對方唔好再呃其他藝人同投資方，所以先公開澄清，避免再有其他人受騙，而大台都會從法律途徑出信予對方追討。