韓國女團少女時代(少時)8位成員不時分開進行個人活動，就好似秀英、徐玄、允兒咁，個人活動時多以演員身份見粉絲。近日三位成員都有劇集喺MBC電視台播出，不過自MBC工會於本月4號開始總罷工起，三位成員嘅劇集就有唔同嘅命運。

允兒主演嘅《戀愛中的王》係先拍後播劇集，早於劇集播出前已經完成所有拍攝、後製嘅工作，所以就唔受罷工影響，會繼續於周一、二播出，並將於本月19號大結局，不過之後接檔嘅《20世紀少男少女》已經中斷拍攝。

而秀英主演嘅周末劇(逢周六、日播出)《做飯的男人》就受到罷工影響，目前已經中斷拍攝。《做飯的男人》上周六先首播，但長達50集嘅劇集目前只拍到第8集嘅部分，後續係點仍然係未知數。MBC方面對此表示：「因為仲有三周嘅劇集份量可以播出，所以劇集唔會即時停播。」

至於負責徐玄主演嘅周末劇《小偷傢伙，小偷大人》嘅劇組就冇參與今次罷工，所以劇集就如期進行拍攝中，不過據悉負責劇集後製嘅員工就有參與罷工，所以劇集亦有可能會受到影響。