煲呔為咗挽救民望，硬推校園驗毒。點知驗尿條橋先天不足，搞到政府高層成個暑假四出撲火，撲到噚日開學日，終於輪到警隊一哥特警成同教育局副局長陳維安，落大埔區議會聽意見。可惜班區議員實在太「低呢」，完全交唔到戲，一時搬鴉片戰爭出嚟硬撐政府，轉頭又向一哥申訴自己仔女中咗傳銷陷阱，離晒大譜！搞到八方以為自己睇緊黃子華棟篤笑。

講鴉片戰爭撐驗毒

政府想喺大埔率先試行校園驗毒，自然要落區諮詢，但呢區係保皇黨天下，唔少議員排住隊幫政府做勢。鄉事派區議會副主席文春輝最出位，佢話鴉片戰爭、東亞病夫等百年恥辱都係因毒品而起，唔明點解仲有年輕人強出頭向驗毒說不。
獨立議員余智榮先鬧政府，搞到驗毒好似場騷咁，但其實佢係曲線保皇，講完即叫政府推行強制驗毒。民建聯王秋北就好似發緊夢咁，講咗咁耐，仲問驗尿會唔會阻住學生上堂；陳維安惟有答佢，驗尿只需15分鐘。民主黨關永業都唔執輸，建議推行一校一緝毒犬，唔知佢有冇留意到，早排海關緝毒冇狗用？陳維安得到咁多人支持，都同班區佬膠埋一份，話香港每個年輕人都有責任做個榜樣，參加驗毒計劃係等於認同一個無毒校園喎。

層壓式推銷都關事

不過，咁都未算，最爆笑嘅場面係一哥特警成一心諗住嚟講驗毒，但諮詢大會竟然變咗申訴大會。報稱高球教練嘅陳灶良議員話，早排佢個仔做暑假工，問佢借咗萬五蚊買貨，佢明知阿仔俾人呃，但為免傷害父子感情，都照借畀佢，結果當然損手離場，點知冇耐又到阿女借錢。陳議員問一哥，有冇關心吓呢啲層壓式推銷問題，話呢家嘢搞到家庭好多爭拗。
做過電影導演嘅羅舜泉議員又加埋把口，話自己幫過幾個喺纖體公司做嘅少女，佢哋中咗求職陷阱，簽咗約交唔夠quota，要賠幾皮嘢畀公司。羅生話佢報咗幾次警，又跨區搵其他區佬求助都冇用，話對警察好失望。
校園驗毒千頭萬緒，好應該全面諮詢先推行，但如果政府將是但噏嘅意見當秘笈，咁就真係死得喇。
mailto:[email protected]