今個聖誕行街濕平時候，不妨抬頭四圍望，可能有意想不到嘅收穫！好似東涌東薈城咁吖，今年聖誕特別引入韓風，同韓國著名新晉人氣插畫師DearDays合作，首度將對方嘅細膩韓式插畫風格帶到香港，轉化為各式聖誕裝飾，仲創作咗大型壁畫村，營造歡樂節日氣氛之餘，仲畀多個靚靚景點等大家selfie。

DearDays來頭唔少，09年開展插畫事業後，獲邀同唔少知名品牌同政府部門合作，仲攞過唔少韓國設計獎項，例如韓國最大服飾品牌衣戀集團E.LAND 2010年最佳設計師大獎、2014年SDF首爾設計節入選設計師同第23屆KSIR插圖全國大賽特別獎。