你有冇豬呀？家有小豬或養緊迷你豬嘅讀者，如果你哋隻豬仔鍾意上鏡，或者你哋想佢見吓世面，不妨callcall白鴿黨，事關佢哋急需一隻豬仔應急。白鴿同豬應該冇乜兩句，搵隻豬搞乜呢？下星期三財爺公布預算案，白鴿黨想拖隻豬去立法會請願。
白鴿黨如意算盤係出動真豬諷刺政府豬籠入水，冇隻真豬搵人扮，效果就差一截，為求真豬，據聞佢哋願意畀些少酬勞肯捱義氣嘅豬仔，想出鏡博出位嘅豬嘜，呢個可能係成名機會。除咗小豬嘜，下星期三立法會門外仲有其他畜牲蒲頭，「阿牛」曾健成必到，白鴿黨單仲偕「單雞」、民建聯蔡素玉「素鵝」都會亮相，如果煲呔DonaldDuck都湊熱鬧，十足十盆菜啲料，真係禽畜大集會咯。