2018年話咁快又到9月，今個月繼續有唔少韓劇出籠，當中兩大型佬蘇志燮同宋承憲都有新劇推出，三年冇拍劇嘅蘇志燮變身國情院情報員，而宋承憲就唔做地獄使者轉行做騙子，唔知大家有冇心水煲邊齣劇呢？

（一）KBS《今天的偵探》（首播日期：9月5日）
由崔丹尼爾及朴恩斌主演嘅KBS《今天的偵探》，係講述專門捉鬼嘅偵探崔丹尼爾同熱血偵探助手朴恩斌，佢哋同一個可疑嘅女人相遇後，即時捲入奇怪嘅案件。

（二）tvN《百日的郎君》（首播日期：9月10日）
tvN首齣月火劇(逢周一及周二播出)，即搵來人氣男團EXO嘅D.O.做落難王子，並夥拍南志鉉主演嘅古裝劇。劇集以先拍後播嘅方式播出，D.O.呢位完美王子，因為一次受傷而失憶，變成一無是處嘅平民，之後喺民間認識咗開偵探社嘅南志鉉，從而發展出有趣嘅故事。

（三）OCN《客：The Guest》（首播日期：9月12日）
憑韓國賣座電影《與神同行》再度人氣急升嘅金東旭，夥拍經典韓劇《咖啡王子》舊拍檔金材昱，故事以韓國驅魔和巫術為題材，講述靈媒、司祭和警察互相較量嘅故事。金東旭喺劇中飾演生於巫師家族，一次被靈體上身後而失去媽媽同奶奶，被驅魔後仍然能夠感受別人無法感受嘅東西。至於金材昱就飾演睇起來冷冰冰而冇人情味嘅副司祭，並會協助司祭驅魔。

（四）KBS《我的唯一守護者》（首播日期：9月15日）
由崔秀宗、UIE、李章宇主演嘅周末劇《我的唯一守護者》講述女主角UIE嘅爸爸喺28年後突然再出現，令到UIE嘅人生發展巨大轉變嘅故事，同時亦揭示咗UIE父親不為人知嘅過去。

（五）MBC《我的愛情治癒記》（首播日期：9月16日）
由延政勛、蘇有珍等主演，係周末長篇劇，講述一個唔好運嘅女人最後成功嘅故事。

（六）MBC《壞爸爸》（首播日期：9月17日）
由張赫、孫汝恩、申銀秀主演嘅《壞爸爸》，故事講述為咗成為好爸爸而選擇做壞人嘅一家之主嘅故事，張赫曾經係頂尖嘅拳擊運動員，點知失去一切，變成一無所有嘅綜合格鬥技選手。

（七）MBC《我身後的陶斯》（首播日期：9月19日）
韓劇《主君的太陽》男星事隔三年再拍新劇《我身後的陶斯》，夥拍童星出身嘅鄭仁仙合作，劇集遠赴到波蘭華沙取景。劇情講傳聞中嘅國情院情報員蘇志燮，同單身媽媽嘅鄭仁仙做咗鄰居，喺蘇志燮幫助下，鄭仁仙得知丈夫失蹤嘅秘密，兩人因而展開浪漫嘅愛情故事。

（八）JTBC《第3種魅力》（首播日期：9月22日）
接檔人氣劇《我的ID是江南美人》播出，由《浪漫滿屋》、《製作人們》表民秀導演執導，並由徐康俊、李絮擔任男女主角，徐康俊飾演心思細膩嘅現實型男人，屬於典型嘅模範生，同充滿活力兼熱血上進嘅李絮遇上，兩人被對方嘅第三種魅力所吸引而發展愛情故事。

（九）tvN《從天而降的一億顆星星》（首播日期：9月26日）
改編自2002年由木村拓哉、深津繪里等人主演嘅日劇《從天而降的一億顆星星》，韓版由《回答吧！1997》男星徐仁國及《今生是第一次》女星庭沼珉主演，劇情講述男女主角原本係兄妹，但因為小時候失散咗，大個咗之後因為冇認出對方來而發展出感情，劇情同昔日經典韓劇老土情節有得揮，唔知適唔適合現時嘅觀眾口味呢？

（十）OCN《Player》（首播日期：9月29日）
劇集將接檔OCN人氣劇《VOICE 2》播出，講述由天才騙子、黑客高手、賽車選手、天生打手組成嘅四人幫，搵返匿藏嘅違法財產回饋社會嘅故事，宋承憲飾演天才騙子姜赫利，而Krystal就飾演賽車選手車雅玲。不過劇迷嘅焦點就落在41歲嘅宋承憲喺劇中會唔會同23歲嘅Krystal有感情戲份。

（十一）tvN《Nine Room》（首播日期：9月29日）
接檔人氣劇《陽光先生》，由金喜善、金英光主演，劇情講超級惡女死刑犯金海淑，與改變自己命運嘅律師金喜善，以及擁有命運鑰匙嘅男人金英光，係一個講復仇嘅故事。

更多韓流，喺晒《娛果》
http://fb.com/appledailyent