【新增回應】

86歲嘅胡楓真係老當益壯，咁大年紀仲成日去做義工帶歡樂俾老人家，真係難得。日前佢同謝雪心、Joe Junior等應榮華慈善基金邀請，帶同家人親身去到海洋公園支持及響應今年首辦嘅「記得唔記得」家庭同樂日，超過800個家庭，逾2,500人扶老攜幼，陪伴家中長輩(主要有認知障礙症患者)去到海洋公園輕鬆玩一日。

平日工作忙到不得了嘅修哥，真係好難得可以四代同堂去到海洋公園玩一日，當日見佢同個幾歲大嘅孫息喺攤位掟波，真係玩得好高興，而現場800幾位長者見到修哥就好似少女見到劉德華咁，不知幾熱情上前要求同修哥合照同攞簽名。修哥啲仔女同孫真係冇諗過係咁嘅場面，原來86歲嘅修哥仲咁受歡迎。

佢同謝雪心喺攤檔教長者玩遊戲，好多公公婆婆輸咗撤嬌，修哥同心姐都好好人放晒水，照俾禮物老人家，氹到啲老人家好開心。」
呢兩年修哥擔任榮華慈善基金愛心大使，好積極幫助有認知障礙症患者，大力推廣追蹤器智愛寶，智愛寶係呢個慈善基金設計出嚟，專門針對有認知障礙症患者一個人走咗出街又唔識返屋企時，只要帶咗智愛寶出街就一定可以搵得返，之前基金會已送咗幾萬個俾有需要嘅長者。嚟緊基金會又會送出幾萬個血壓計俾老人家，方便佢哋喺屋企就可以量血壓。

修哥之後接受傳媒訪問話：「嗰日嘅主題叫陪伴，希望啲仔女多啲陪吓自己嘅爸爸媽媽，又或者自己嘅親人，我、Joe Junior同謝雪心都有分享吓伴家人嘅心得，所以嗰日咪四代同堂一齊去玩，大家都玩得好開心。」

精選娛聞，喺晒《娛果》
http://fb.com/appledailyent