胡定欣今日喺沙田為「麥當勞叔叔之家慈善基金」活動擔任嘉賓，首次親身到現場做探訪嘅定欣，同一位患癌嘅小朋友及佢媽媽傾偈：「知道每個人都有自己嘅難關，佢媽咪都同我都有好多感觸，佢又話小朋友好鍾意睇我套《城寨英雄》…」講到呢度，定欣就忍唔住眼濕濕背住鏡頭，心情平伏完後話：「其實我好想做多啲慈善活動，幫到更多有需要嘅香港人。」

定欣話希望喺聖誕節，可以請埋兄弟姊妹嚟呢度唱歌跳舞同表演畀小朋友睇，佢又透露嚟緊會同鄭嘉穎、郭晉安去三藩市登台，要平安夜先返到香港，仲話因為「胡說八道會」班姊妹好多都開緊工，未必有時間齊齊慶祝聖誕。記者笑指有冇機會俾追求者約去街？胡定欣就話：「咁我寧願做慈善活動啦。」

精選娛聞，喺晒《娛果》
http://fb.com/appledailyent