12月淡市資金流同買需顯示，北水購買意欲仍強，交投相當活躍，中線情況似2014年12月，估計港股可能有多一輪熱潮。不過，中短期調整市究竟會玩幾耐，過程會點，如果一味有勢就追，見走弱就跟沽，呢輪好容易被玩殘。

目前大部分藍籌都跟A股上落，而反映A股大價股表現嘅上證50指數，最近整固持續3、4個星期，調整過程暫時出現兩個階段，先喺11月下旬去到12月頭，公募基金被禁淨沽出A股，上證50由3,000點跌到2,800點左右，其後喺2,830點至2,900點之間橫行咗大約兩個星期。第二階段，係受到新嘅負面消息拖累，美國加息後，人行上調逆回購操作以及中期借貸便利（MLF）利率，再令A股受壓，輕微跌穿50天線，但有別於首階段，暫時未見急劇拋售情況，原因係MLF利率略升未至於觸發資金鏈緊絀。

之前上證50橫行兩個星期，反映A股投資者認為沽到2,830點至2,900點，開始停一停、諗一諗，覺得未係沽貨嘅吸引水平。除非有重大負面因素，以近期調整得嚟有秩序嘅情況，可等待上證50反彈突破橫行頂部2,900點以上，又或者恒指下一次比較接近3萬點時，就係公募基金又想沽貨嘅水平，到時或有新一輪沽壓，於是，短線可能有炒上落空間，記住，唔好等A股、港股突破就嚟追。

晉佳
www.facebook.com/advanceguy1