徐子淇獲Hollywood荷李活冰上之旅邀請擔任宣傳大使，她前晚在九龍塘又一城的溜冰場示範溜冰，子淇說：「我之前都學過滾軸溜冰，以前細個就算成日跌都唔怕痛，溜冰就傷過尾龍骨，自此之後就唔敢玩，最近喺香港出席咗三個活動，我先試玩番，我都成十年冇踩過，最初踩番都驚。」

子淇慨歎未知是否因尾龍骨受過傷，所以影響身高，她說：「我照過X光，發現尾龍骨歪咗，否則我可能高多幾吋。」回想當年母親安排她在課餘時間學騎馬和溜冰，子淇說：「我當時幾厭倦，估唔到𠵱家可以學以致用，重搵到食，媽咪真係用心良苦。」
因擔心觸及舊患，子淇前晚示範時顯得小心翼翼，於大會外籍高層引領下，在冰上擺出不少優美的甫士。子淇說：「我有時腰痛都要做吓按摩同針灸。」
此外，子淇表示聖誕節會休假三周，問到可會與富豪男友李家誠外遊，她說：「我同屋企人時間易就啲，男友嘅工作好忙，佢難就啲。」
採訪：楊潔雯　攝影：陳慧安