早幾日收到個舊同事Whatsapp，猛咁呻啲工作伙伴點衰點衰，鬧呢樣鬧嗰樣，本住做人嘅禮貌，我一直都覆埋啲簡單嘢hea佢，例如叫佢冷靜啲，唔好咁躁之類，畢竟我都離開咗，唔想加太多意見，而且舊公司於我而言已經係nothing，咪煩我啦！

可能舊同事見我冇乜反應同感覺，又再講多啲嚟挑起我注意，仲話佢最憎嗰位同事曾經同我合照，又呢樣又嗰樣，當時我已經知道呢位舊同事冇得救，所以我決定唔再應機，大家唔同世界，話不投機半句多，無謂浪費有限嘅時間。

離開咗舊公司，我人生已經有好多變化，識嘅人唔同咗，做嘅野都唔同晒，而呢位舊同事仍然喺舊公司做緊，佢睇嘅世界好狹小，煩擾佢嘅人和事都仲係舊公司嘅一切，而呢個亦係佢嘅天地、佢嘅價值觀、佢嘅人生、佢嘅王國，一路彈又一路留低繼續做，日復一日，年復一年。

佢嘅世界真係得咁大，等於你同自由行講買嘢要排隊，佢會覺得好奇怪，排咩隊？佢哋國家唔使排隊，香港人要排隊，係我哋古怪，唔係佢哋。

一個人最可悲嘅地方，唔係目光短淺，思想狹窄，因為佢都唔想，最慘係佢唔知自己係井底之蛙，繼續用佢把尺去度你，繼續憑一個好細嘅窿去睇世界，呢個時候唔需要點醒佢，就算打篇一萬字嘅論文，佢都唔會明㗎，根本見識同智慧都未去到呢個境界，佢只會更加憎你，更加肉緊，更加覺得自己啱，由得佢啦，當佢嘅人生揭到去另一章節，就自然會覺得自己好渺小。

專欄作者簡介：
辦公室日報　聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/

發掘更多身邊的小城故事，請LIKE 蘋地 Facebook Page，並設定為「搶先看」： https://www.fb.com/appledailyland