馬刺教練普波域治（Gregg Popovich）一向都醉心慈善工作，經常都運用自己嘅財富同力量去幫助佢認為有需要嘅人。馬刺禮拜二晚喺主場鬥網隊之前就有記者問普帥，「點解咁熱心搞慈善」，呢位勁有性格嘅NBA教頭，就連畀個答案都有型過人！

普波域治話：「因為我哋好有錢，多到我哋用唔晒，咁啱其他人比我哋更加有需要。喺咁嘅情況下，如果你咁都唔做番啲嘢嘅話，你就係XXX喇（a--），就係咁簡單。」事實上，普波域治一直同好多慈善團體，同非牟利機構有合作，今年10月就曾經向超過200位小學生捐鞋，又會捐錢畀食物銀行，真正係出錢又出力。另外，普波域治亦試過匿名捐出大筆善款畀美國受風災影響嘅家庭。

《ESPN》報道，呢位勁有性格嘅教頭最近就同一個為海地籌款嘅機構，以及專門幫助美國同加勒比海地區包括德州、佛羅里達州、波多黎各嘅機構搞慈善拍賣，當中出價最高嘅善長仁翁同一位朋友，可以喺出年1月11號現場喺史達普斯中心睇馬刺作客湖人場波。睇完呢場波之後，佢哋仲會同馬刺一齊飛返去聖安東尼奧，喺當地留三晚（1月11至13日）。到咗13號朝早，呢位善長仁翁同佢嘅朋友仲可以出席馬刺對金塊場波前嘅射波練習，夜晚就坐VIP位睇波。最後，呢位善長仁翁同佢嘅朋友除咗可以同普波域治見面之外，仲可以得到1月13號晚場比賽用嘅籃球，仲可以指定由普帥、或者任何一位馬刺球員簽名添！

雖然做善事唔應該係為咗呢啲額外嘅福利，不過普波域治咁有心搞慈善，都真係好難得嘅！

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM