本來一場馬贏輸好閒,但蘇偉賢馬房之「創基寶」上周三僅敗,對馬主歐陽啟初來講就相當可惜,佢剛於本月初娶靚靚女友小登科,一心諗住贏馬賀新婚,點知受制於「豁達瀟灑」屈居亞軍。拼後隔一周本周三(20日)於第三場匆匆再出,除蘇偉賢想幫歐陽啟初攞番個彩,馬主兩個親密戰友莊友衡及葉志輝,亦齊齊出動務求賀一賀佢。
據知莊友衡係歐陽啟初生意上拍檔,葉志輝就與佢情同手足,呢個兄弟團認真唔話得,今期莊友衡及葉志輝分別有「威利飛越」及「其樂無窮」同於第八場出賽,如果到時一Q,邊隻贏佢哋都咁開心。再講,「創基寶」父系「威利好好」正係莊友衡家族名下,如果贏出,呢場頭馬就更加有意思啦!