譚耀文同袁文傑早於03年曾合作亞視古裝劇《花田囍事》，估唔到14年後，佢哋相遇喺大銀幕，一齊演出電影《辣警霸王花2不義之戰》，袁文傑演澳門司警，而阿譚就係香港警司，因為一單牽涉港澳嘅案件，阿譚要跟袁文傑合作，由於兩地制度唔同，處理案件時一度出現意見分歧。

劇情更交待阿譚帶領何佩瑜（Jeana）、陸詩韻、梁琤、林明禎、余曉彤同鄧洢玲等呢班霸王花過大海查案。阿譚同袁文傑都屬高頭大馬型，佢哋着起制服，份外神氣有型，阿譚今日接受《蘋果》訪問，佢講番同袁文傑由當年公仔箱，o依家跳入大銀幕，佢話：「再合作，大家一樣，冇乜變呀，但之間多咗份情懷，有話下當年咁啦。」

阿譚話童年時志願都有想當差：「細個時，我鍾意扮矇面超人，維持正義，點知大個冇去考警察，但就去咗唱歌，跟住先拍戲，到拍戲先有機會演執法人員，話時話未演過警司，因為呢類角色，真係要有番咁上下年紀先扮到。」佢仲話，今次部戲，其實都好多動作場面，有開槍有飛車，佢寧願親身上陣，唔鍾意用替身，試過拍攝時受傷，阿譚話：「試過開槍時火花入眼，又試過擦損咗嘴。」唔怕破相咩？佢話：「為咗有型呀，亦擔心唔嚟，因為開槍時係唔可以眨眼，係幾唔錫身，但係有技巧嘅，我會型得嚟又安全。」　
　
Jeana首次同兩位型男合作，佢話喺兩位前輩身上學咗好多嘢：「平時我啲對手好少好似我咁高，我往往高人成個頭，但我拍埋袁文傑度，佢仲高過我，同佢拍戲，佢講嘢好幽默。」講到阿譚，Jeana直認被佢眼神迷倒：「佢扮我上司，我同佢眼神一接觸，就可以入到戲，佢演技真係好自然。」