視拎第一為人生成就嘅777，噚日又再成就解鎖，成為第一個支持度跌到得個位數嘅特首，加上有六成人畀佢零雞蛋，肯定係前無古人，八方仲希望後無來者。之不過，如果你仲有眼睇777點處理呢場疫情，都應該好有信心佢支持度應該「沒有最低，只有更低」，甚至可以再考第一，不過呢個「第一」係民望最低領導人。

777今次喺香港民意研究所民調入面得番9.1%支持率，有連登仔就發現，原來佢嘅「成就」已經超越咗曾經被形容做「九趴」總統嘅馬英九，時為2011年9月，亦係馬英九任期尾聲，佢喺台灣嘅民調滿意度跌到得番9.2%，換言之777險勝一個馬鼻，稱冠兩岸三地。

下個目標朴槿惠

不過，777仲有兩個目標人物要挑戰，先可以稱霸全球！佢下一個目標，係現時已經淪為階下囚嘅南韓前總統朴槿惠。當日朴槿惠被揭發密友干政醜聞，南韓人個個星期上街，最終成功踢走濫權總統，而朴槿惠當時支持率一度跌至4至5%，創下歷屆南韓總統支持率最低紀錄；至於777嘅終極目標，就係巴西前總統特梅爾（Michel Temer），佢之前做副總統，2016年時因為前任總統羅塞夫被彈劾落台而接任，點知貪腐程度同樣驚人，仲要不知民間疾苦，結果有民調顯示佢支持度去到只得3%，被視為世界紀錄。如果777真係挑戰成功，肯定可以係世界歷史留（污）名，但相信到時全世界都會戥香港人慘囉。

李八方