年僅20歲嘅日本偶像須藤凜凜花，今年6月參加「第9屆AKB人氣總選」時突然宣佈要結婚，繼而被爆犯禁拍拖，宣佈退出NMB48。

須藤凜凜花退團後首次亮相電視節目，並接受NTV綜藝節目《Down Town DX》訪問，曾公開自爆係處女嘅凜凜花被指背叛粉絲，佢今次大談結婚計劃，一度盛傳佢已同圈外男友分手，但凜凜花就自爆錄影節目前已定好婚期，仲強調呢次係佢初戀，亦係唯一一個男朋友。凜凜花否認未婚夫係報道所指嘅Band仔，但承認另一半目前20多歲，入住月租6萬日圓嘅房間；訪問過程，凜凜花仲死撐話本來想兼顧愛情與偶像事業，形容參加「人氣總選」係為搵食，發言又一次刺激宅男fans，而早前嘅留學消息，凜凜花就解釋只係以前嘅計劃。