【新增影片】
曼聯喺周日英足盃第五圈作客布力般流浪飽吃驚風散，最終靠伊巴謙莫域後備建功贏2:1，晉級八強會作客車路士。紅魔呢場波半力出擊，有英國傳媒統計過，佢哋呢場七位後備嘅轉會費總值高達1.93億鎊（近19億港元），成為英足盃史上最寸嘅後備席，連領隊摩連奴都話大把掣㩒！

其實又有乜咁出奇，淨係一個保羅普巴都孭住8,900萬鎊，仲有桑馬達、艾歷拜利同勞基梳爾位位過3,000萬鎊，加埋650萬鎊嘅舒韋恩史迪加，只有伊巴同青訓門將甸恩軒達臣（Dean Henderson）唔使轉會費。結果呢招又真係work喎，「雙巴」後備入替就造就2:1反勝入球，有數據仲話普巴今季五個助攻都係交畀伊巴，名副其實係好拍檔！