70位議員今日「開學」，未來4年要喺大樓朝夕相對，唔少同學仔卻相見不相識。八方開學前突擊7位新丁，搵佢哋睇相認人，測試對30位傳統功能組別議員嘅認知度，唔少新丁僅認到半數，幾乎肥佬！
功能組別以建制派佔多數，建制新丁認人成績相對唔錯。民建聯張國鈞認唔到專業議政梁繼昌，只記得佢係會計界，衞生服務界李國麟同資訊科技界莫乃光就要提水先認得，連同陣營嘅勞工界何啟明都唔認得，只知對方係工聯會。

周浩鼎全數認出

何君堯雖認到19個，但唔少要提水先pass，工聯會何啟明、勞聯潘兆平完全唔知乜水，陸頌雄就稱作陸頌榮，甚至將金融服務界張華峰稱為象哥，真正嘅象哥民建聯黃定光就唔知叫乜名。
民主黨林卓廷認到22個，但佢亦非完全認唔到：「旅遊界，姚乜嘢呢……陸議員天水圍嘅（區議員），呢個勞聯……」佢笑笑口話同建制派議員只係君子之交，唔使太熟啦！

佢黨友許智峯認到19個，笑指有啲真人同相片差太遠，例如姚思榮真人多啲白頭髮；但佢連加入非建制群組嘅醫學界陳沛然都唔識：「呢個邊個嚟㗎？（陳沛然）未見過佢真人，所以唔認得。」
公民黨譚文豪讀出18人名字，但將廖長江錯認其兄廖長城、鄉議局劉業強只認得「發叔個仔」，記唔起陸頌雄個名，只稱「擠暗瘡嗰個」。佢記得金融界議員叫振英，卻忘記姓乜，笑稱叫佢振英會更親切。
青年新政梁頌恆認人能力認真麻麻，托頭苦思良久先認出姚松炎、葉建源、邵家臻、梁繼昌、鍾國斌、馬逢國、梁君彥7個。佢話有啲議員交換過卡片，但match唔到個樣，包括吳永嘉。
民建聯周浩鼎成績最好，講齊30個議員名字，佢話開會前有做功課，自信爆棚話：「我應該係少有哋答啱晒，唔會搵到第二個。」

李八方
mailto:[email protected]