因之前演出韓國育兒綜藝節目《超人回來了》而人氣急升嘅男星宋一國，未知係咪趁住放假，就帶三胞胎大韓、民國、萬歲去滑雪。由於宋一國以前喺三胞胎仲係2、3歲時，拍攝節目之際已經帶三胞胎去學滑雪，所以雖然三胞胎依家先得4歲人仔，但已經滑得好叻。

宋一國今日凌晨係Instagram上載一段短片，短片中係民國自己一個滑雪嘅身影，宋一國更感性地表示：「民國自己一個滑雪！太開心幾乎喊出嚟。」又加上喊嘅表情，相當搞鬼，而大韓同萬歲似乎仲未可以自己一個滑住，不過身為老竇嘅佢就對囝囝十分有信心，相信大韓同萬歲好快都可以做到。

除咗民國嘅短片，宋一國更上載三胞胎食蛋糕嘅相，大韓食到舔舔脷，而民國就食到變咗污糟貓，萬歲更擺到上個鼻度0添，認真可愛。

另外，《超人回來了》噚日播出最新一集，係所有家族現身去年年尾《KBS演藝大賞》嘅內容，一班小朋友咁得意，立即吸引唔少藝人去睇，當中包括「新國民女團」TWICE、I.O.I、惠利等，而人氣王大發BB被問到鍾意TWICE邊個姐姐，大發BB就衝去攬住娜璉，令娜璉相當驚喜，大發BB更錫咗娜璉面珠一啖，隨後大發BB更怕醜地讚娜璉靚女。