閱讀與飲食一樣，每個人嘅口味都唔同，可以乜嘢都啱，又可以獨沽一味。新鴻基地產（016）主席郭炳聯向來鍾意閱讀，新地首席財務總監（CFO）陳國威（Patrick）爆料話，郭炳聯原來好鍾意讀名人自傳，希望藉此吸取別人經驗，對自己都有幫助咁話。
一年一度嘅香港書展噚日開鑼，雖然郭炳聯係愛書之人，但係冇現身，只係派出Patrick主持一個新地有份贊助嘅活動。
Patrick爆料，指老闆郭炳聯時不時會跟一班管理層與經理分享好書，最近就睇緊《林肯傳》，研究緊林肯嘅領袖才能。
郭炳聯原來特別鍾意讀名人自傳，之前已經讀過《喬布斯傳》、《李光耀觀天下》等等，應該係想透過閱讀名人嘅成功故事與經歷，向唔同嘅領袖偷師。

而除咗名人自傳，郭炳聯對中國文化亦有興趣，特別鍾意睇《易經》，覺得當中好多對人生嘅啟發。
其實都啱嘅，郭炳聯日日實戰做生意，做唔同嘅投資決定，唔通仲要睇如何發達、如何做股神之類教人搵銀嘅書咩？
至於Patrick自己，佢話，最近因為工作關係，主要閱讀跟經濟、管理相關嘅書籍。閒時佢嘅口味就比較雜，乜都啱，除咗呢類工具書，仲鍾意睇老一派嘅漫畫與小說，已經睇晒金庸武俠小說、福爾摩斯偵探小說等等名著，小時候亦都讀過《咆哮山莊》、《基度山恩仇記》等。

李華華
mailto:[email protected]