韓國男團EXO中國成員Lay（張藝興）目前專注於大陸市場，更於大陸設有工作室，不過今日大陸就傳來消息，指Lay因拖欠機票錢而被大陸嘅機票代理公司起訴。

據知Lay分別託人於代理公司訂購5月3日由福岡至北京嘅機票（11,050人民幣），之後又訂購兩張5月5日由北京去東京、再去鹿兒島嘅機票，共11,815人民幣。有指事後代理公司多次向Lay方面催交機票錢，不過至今Lay方面仍未付清欠款，代理公司因而起訴Lay，要求Lay支付機票錢、利息及因欠款而引起嘅損失，合共26,235人民幣，法院亦正進一步審理中。

消息公開後，大批粉絲都唔相信Lay會欠機票錢，認為當中有誤會。

至今日下晝，Lay嘅工作室發聲明，表示一早已向姓劉嘅委託人支付所有機票錢，不過委託人冇向代理公司付款而且失去聯絡。Lay嘅工作室否認接到法院或起訴方嘅信息，表示會先向代理公司墊付相關費用，之後再起訴姓劉嘅委託人。