今日立法會相當平靜，但大樓外就唔多平靜。話說午飯時間，立法會外嘅添美道呠聲四起，八方見到外面大塞車咁款。原來疑似係一架的士同一架私家車有些少碰撞，兩架車嘅司機都落咗車研究點解決。不過佢哋所處嘅位置，正正係立法會外近住添美道迴旋處嘅路口，兩架車停咗喺度，變相堵塞晒成條添美道。

據現場人士講，兩架車停咗喺度都有10幾20分鐘。難怪成條添美道都係車龍啦﹗而法律超人謝偉俊嘅座駕，就因為呢單嘢而塞住咗喺立法會停車場出入口，呢個時候，謝偉俊終於忍唔住出手，落車上前睇吓發生咩事，仲以專業律師身份勸兩位司機大佬駛埋一邊先，免得塞晒成條路。

經過謝偉俊一輪調停，兩位司機大佬終於聽教，將架車駛埋一邊，其他車先至行得番。而謝偉俊亦上番車離開啦。