汪明荃前晚喺澳門舉行「50週年 The Timeless Concert 2018」演唱會，好友森森同斑斑兩姊妹，仲有97年港姐冠軍翁嘉穗孖老公鄔友正都專程去到澳門捧場，當然唔少得老公羅家英上台為阿姐打氣啦！

入行超過50年嘅阿姐，今年8月28日就71歲喇！依然唱得跳得，演唱會唱足3個鐘，懷舊國語金曲、經典電視劇金曲、電影歌曲、粵劇、勁歌熱舞等多個環節，總共換咗8個造型，唱咗超過30首金曲，體力同毅力令人佩服，就連家英哥上台簡述阿姐嘅威水史時，都大讚老婆，氹到阿姐甜到漏。

完騷後，森森同斑斑、翁嘉穗同老公都分別去到後台同阿姐敍舊。對於好朋友捧場，阿姐開心話：「森森、斑斑唔單只係我好朋友，森森更加係我讀麗的映聲第一期藝員訓練班同學，相識超過50年，佢哋知我鍾意飲茶，送咗茶葉同扮靚小禮物畀我，好窩心。」

其實家英哥都好窩心，一直陪住阿姐綵排到出騷，阿姐都話真係好感動：「佢真係好唔話得，今晚做完自己嗰部份就趕住走，因為要一早飛去銀川，嚟緊廣州站佢又係咁趕，所以我好感謝佢！」

另外，今個星期六喺廣州中山紀念堂舉行嘅巡唱，演出地點對阿姐嚟講係別具意義，1984年曾經喺中山紀念堂出席「詩與歌朗誦晚會」，擔任壓軸表演嘉賓，亦係當年少數被邀請到內地表演嘅香港藝人之一，阿姐話：「相隔34年，今次汪明荃以個人演唱會喺咁有歷使價值嘅場館舉行，我真係好開心！」

精選娛聞，喺晒《娛果》
http://fb.com/appledailyent