【新增影片】
金錢幾有吸引力？睇吓腰纏萬貫嘅球星都不時扭計加薪就知，但對於巴洛迪利嚟講，為咗追求快樂，減薪都值得！法甲球會尼斯周日宣佈，同巴洛迪利續約一年，並透露呢位意大利前鋒願意減薪留隊！

巴神舊年夏天完約離開利物浦後加盟尼斯簽約一年，大踢爭氣波上陣28場入17球，並領軍取得41年來最高聯賽排名第3位兼進軍歐聯。雖然近月有指巴神勢將離隊，包括盛傳轉投多蒙特，但尼斯周日以續約消息粉碎傳聞：「為咗延續喺尼斯嘅冒險旅程，呢位意大利國腳作出可觀嘅財政妥協，亦係佢季後一直傾向跟隨競技層面同心意嘅決定。我哋今日相當高興，歡迎你Super Mario。」巴神亦喺社交網站同球迷分享喜悅：「有冇人感到高興？我係呀！」

↓尼斯短片賀巴神留隊↓
http://bit.ly/2u4LYke