亞洲電視與新城電台今日一早去到科學園參與《公益金新界區百萬行》，率領住亞視員工劉鍚賢、蔡國威、宮雪花及袁潔儀等出征嘅葉家寶，以關正傑名曲《天蠶變》其中兩句歌詞「膽小非英雄決不願停步」作口號，葉家寶呢兩句口號正代表六百位亞視員工心聲，大家會繼續堅守落去，會見到亞視嘅曙光出現。

經已去到三月中，葉家寶再次以嚴峻關口嚟形容亞視現時面對情況，佢話：「呢個禮拜開始又要交好多費用，好似係牌費、強積金、公積金同月底要發人工，暫時起碼要籌集二千萬，我哋管理層會盡力，唔想拖糧，而亞視每分每秒都係變化當中。」

對於之前有傳皓文控股洽淡亞視股份，葉家寶話：「之前已經講過冇同呢間公司洽淡，希望投資者要小心處理，我哋期望原本股東同新投資者達成共識。」另外亞視三月份開始會有製作節目，如早前打吡大賽專輯都反應好好，而四月份就會舉行《好歌金曲之夜》，同觀眾重溫十首不可不聽好歌，而暫時排行頭十位歌曲中歌手如蔡楓樺，屆時都可能會出席獻唱，問到係咪義務演出？佢話：「都係象徵式有車馬費，夠坐車，現時所有製作都盡量零消費，錢係留畀員工出糧，我做執董責任係要將員工出糧放首位。」

蔡國威聽到葉家寶指仍欠二千萬才夠支付三月份開支，佢話：「都明每月都有正常開支，真係希望可以如期出糧，先穩定員工心理，等大家安心等到真正白武士出現，之前一直講咁耐白武士都係其他顏色，希望純正白色武士出現。」佢本身對亞視有信心，雖然八月尾將跟亞視完約，暫時仍未傾續約問題，佢話：「我寧願傾多啲外面工作，呢幾個月有唔少工作。」佢指若果冇外快，本身收入都夠過活，問佢會唔會離巢過檔其他電視台？佢話：「暫時唔考慮，除非有一日亞視有唔好嘅消息，未到呢日都唔考慮，而續約與否要睇到時傾條件，續約機會都大。」