美韓混血女星水原希子上年開始將發展基地移至強國，唔止同王菲大女竇靖童出雙入對，仲接拍趙薇執導新片《沒有別的愛》，本來可以成功打開中國市場賺人仔。不過趙薇執導新片《沒有別的愛》最近惹來杯葛風波，繼趙薇及台灣男星戴立忍先後跪低，水原希子都拍片向中國人認錯，否認自己曾參拜靖國神社，但就承認幾年前對一張朋友張貼嘅辱華照片讚好，佢表示當時唔清楚照片真正含義，為此以中文說出「對不起」表示歉意。

認錯消息傳到日本，大批日本網民批評水原希子做法，更對水原希子割蓆表示自己冇日本人血統大表反感。呢邊廂，強國網民繼續對水原希子咬住唔放，翻炒佢以前嘅blog曾貼出達賴喇嘛著作《流亡中的自在》（FreedominExile）之封面，又po中國地圖，印有TIBETANDHERNEIGHBOURS，意即係「西藏和她的鄰國」。就因呢兩張照片，網民未經思考就認定水原希子支持藏獨，近日佢已把該po文刪除，望能平息風波。

身為水原希子閨密嘅王菲愛女竇靖童，噚日佢轉貼好友嘅道歉片，仲加多句：「她想說的說」點知昨晚，童童微博突然變成空白一片，難免令人聯想同水原希子有關，更有網民猜測，因童童只挺水原希子而冇撐趙薇，引發趙薇粉絲不滿狂轟，令童童一怒之下「棄博」。