近期提起陳凱欣，大家會關注佢係立法會議員嘅身份，但唔會忘記佢係傳媒出身，仲喺浸大傳理學院40周年時獲頒授「傑出傳理人獎」，雖則一切，俱往矣。往事不堪回首，前路都要繼續走，浸大上周五舉行傳理學院50周年院慶時頒授新一批22位「傑出傳理人獎」，呢次續有政助上榜，現屆嘅有曾任香港新聞行政人員協會主席、現為財政司司長陳茂波政助嘅何翠萍，過氣嘅則有喺邱騰華做環境局局長時做政助嘅蔡少綿。而對市民嚟講，榜上有名嘅吳佩賢好似仲吸引。唔知係邊位？之咪就係01年浸大傳理畢業嘅商台DJ朱薰。

另一位獲獎人士亦非常重量級，就係91年畢業，之後做過財經記者又喺金管局任職、現為圓通財經公關顧問有限公司創辦人及董事陳民傑（Thomas），金管局前總裁任志剛同前政務司司長唐英年都對Thomas讚口不絕，任總大讚一直幫佢處理公關事務嘅Thomas做事認真，態度專業；有份提拔Thomas嘅唐唐就話Thomas願意扶持新人，極為難得。獲獎嘅Thomas非常感謝母校栽培，指獲獎對個人而言係一大鼓舞，對圓通嚟講更係強心針。