本地Rapper MastaMic(馬米) 晚上喺旺角麥花臣舉行《Mastapiece Tour 2018》演唱會， 吸引唔少觀眾到場支持，全晚馬米同舞蹈員又唱又跳，落力演出。喺演唱會上馬米透露今次為咗今次演出，自己投資咗幾十萬，仲預咗蝕錢：「不過我蝕錢唔緊要，最緊要做得開心。」

嘉賓方面就要請到鄭欣宜，仲同馬米合唱一曲「Not Afraid」，台上馬米感謝欣宜腳傷未癒都肯嚟支持，仲希望未來可以同欣宜喺第二個舞台再合作。到Encore環節，台下觀眾不停叫馬米除褲，結果馬米不肯就範，只係肯除鞋、除帽同除衛衣拋落台下。

馬米接受訪問時話：「雖然未睇今次票房有幾多，但都真係有機會要蝕錢，不過唔緊要，盡力而為。」佢話自己今次分文不收，寧願將所有錢做好製作，佢透露：「第一次喺麥花臣做騷，好多事要親力親為亦學到好多嘢。因為人手有限所以只能夠做到一場，希望下次去更大嘅場地，而且亦要再儲吓錢。」

講到嘉賓欣宜，馬米話都係拍膊頭叫對方嚟幫手：「欣宜嚟緊要做紅館騷，加上之前腳傷未好番晒，今次都肯嚟撐我，真係好多謝佢。」

精選娛聞，喺晒《娛果》
http://fb.com/appledailyent