鄭伊健噚晚喺中環出席服裝品牌I.T.活動，因為係宣傳太陽眼鏡，所以黑麻麻佢都戴住副超。

伊健早排同老婆蒙嘉慧去咗北海道滑雪，慶祝結婚周年紀念，佢話：「係，不過已經過咗，冇送禮，主要係去旅行，休養下，因為之前去澳洲拍特輯時，一去到就拍落水，病到依家，終於知道咩係內感，食緊中藥調理，所以過年就休息下。」問伊健有冇叫老婆煲補品補下身，佢笑話呢方面會問下媽咪俾意見。

伊健上年一路都好忙，年29終於可以收爐，佢話同周秀娜宣傳完《我的極品女神》之後，就可以真正休息，休息到初十一，過年會留港銷費，支持香港經濟：「呢排成日聽到零售業下跌，喺香港辦下年貨啦!我好鍾意過年去旺角同太子，每年都去，鍾意睇下嗰度嘅變化，去買下玩具，聽聞好多舖(玩具)都執咗。」落旺角唔怕俾人圍咩?佢話：「我喺車入面，而且年初一好靜，好有經驗，年花就未必會買，但年貨係要辦。」

伊健冇小朋友，所以佢嘅利是就有入冇出，雖然親友唔多，但古惑佬班拍檔個個做晒老竇，都有唔少噤派。問伊健會唔會生番個，幫手逗利是冇咁蝕?佢即刻笑晒擰手兼擰頭：「唔使喇!我寧願畀。」