今晚《最佳女主角》嘅嘉賓就係羅蘭姐，佢本身出身富裕之家，不過因為日本侵華，變成一無所有，佢話:「當時有日本仔嚟搵花姑娘，所有人搽到塊面黑晒，我唔識驚，但啲媽媽驚到震晒，香港亦乜都冇晒，死城一樣。」

佢憶述好多香港淪陷時親身經歷嘅情況:「當時好多人因瘧疾而死，好多包租嘅人就好驚整污糟間屋，就會搬條屍去啲吉屋，仲聽到有人講嗰度有條屍，啲大髀肉俾人割咗去，佢哋已經餓死，仲有幾多肉呢?媽媽仲話比我聽:『你舅父去飲茶，真係食到個叉燒包有手甲』...當時隨街有死屍...」

羅蘭又憶述爸爸過世時係38歲，原來佢外面有有女人，喺嗰女人度食鴉片，當時日本打到嚟，冇得食，要戒，但原來戒煙會出事，一戒就痾，醫佢用咗好多錢，最後都唔得。羅蘭又話當時有人同佢媽咪講:「帶住個女唔好要啦，賣咗佢啦，或者仲係條生路」佢媽媽話:「我唔會賣，餓死就攬住一齊死。」羅蘭姐說起亡母雙眼通紅:「佢湊我係好辛苦，我細個又多病痛，到日本仔嗰啲時間，點都補償唔到。所以到媽媽病，我都求天主俾佢長壽，或我減壽，不過冇辦法啦，人始終要走，媽媽，我永遠愛你，到死嗰日我都係咁愛你。」

講到成日做奸角，羅蘭姐不以為然，佢覺得自己唔係明星，係一個演員，其經典奸角，《神鵰俠侶》入面嘅裘千尺，成個巫婆一樣，媽媽睇到鬧佢:「TVB冇人用咩?咁肉酸你都做!?你睇你幾醜樣幾肉酸!」羅蘭就話:「唔係喎，我鐘意，我想知自己做唔做到個味道出嚟。」羅蘭姐更為呢個角色，真係去買啲棗，練習吐核吐得有幾遠。羅蘭姐咁專業，就算唔拎影后，演技一早受到大家肯定啦!