【新增內容】
由「奔五」嘅鄭嘉穎同半百嘅謝天華主演嘅《風雲5D》音樂劇，前晚喺紅館開鑼，身為步驚雲……即係鄭嘉穎個女友陳凱琳（Grace），當然有去捧場，Grace前晚被目擊拖住嘉穎媽咪一齊睇男友演出，被指係行奶奶政策，Grace接受傳媒訪問時直認同未來奶奶行孖咇：「係呀，我同嘉穎媽咪一齊，我哋成日都一齊㗎，佢好可愛㗎！我好鍾意佢媽媽，我哋都想支持嘉穎，尤其係佢第一場騷，所以一齊去睇。」咁未來奶奶係咪都好鍾意你？Grace話：「我覺得應該係！」

好啦好啦，都講到咁白咯，咁不如講吓睇完嘉穎演出覺得點啦？Grace（好hard sell咁）話：「Super good！我以佢為榮。其實我已經睇過綵排，佢真係好勤力，好用心，付出好多努力！」而Grace亦喺自己個Instagram貼出同男友嘅合照，並以英文留言：「My Knight in Shining Armour! I know how hard you've trained, how long you've practiced, and I'm so, SO proud of your performance!」睇唔明？唔緊要，講到底都係讚啦，點讚都係讚咁啦……

第一晚係正印女友拖未來奶奶力撐，咁第二晚呢？輪到前度女友——王馨平（Linda）捧場，唔知係刻意定咁橋，現任同前度分場現身，不過Linda就未喺社交媒體公開評嘉穎演成點，但據知，雖然嘉穎同Linda曾經係一對，但再見後仍是朋友，兩人其實好friend，見Linda不避嫌捧場就知，佢哋仲有喺後台合照㗎！

Linda接受《蘋果》電話訪問時，透露係嘉穎安排佢去睇：「嘉穎之前問我睇唔睇，我話如果喺香港一定捧場，所以佢幫我安排啲飛，老公唔喺香港，佢出公差，今日先返，所以佢睇唔到。我哋同呂良偉都好friend，好多人話呂良偉做得好好，所以老公都想去捧場。」問到佢覺得套劇好唔好睇？同嘉穎做成點？Linda話：「我覺得好睇，好鍾意服裝，服裝好靚，全新創作嘅廣東歌又好聽，歌詞又好，編曲又好，每一個都好賣力演出，做得好好，係真心㗎！」