港股調整途中勁chok，繼續保持觀望。轉個話題，講吓最近同瑞聲（2018）管理層見面後嘅發現。佢哋講到未來發展重點係光學零件，根據瑞聲上半年業績，光學零件業務基數近乎零，但長遠希望光學零件嘅收入比例起碼達到三成、甚至五成以上。換言之，瑞聲將會同從事手機光學零件嘅舜宇（2382）、大立光喺同一戰場，正面交鋒。

瑞聲向來供應iPhone嘅觸碰馬達、喇叭、天線加speaker box，莫非見人家做鏡頭好賺，自己又走去做？其實瑞聲早喺2010年已經投資丹麥嘅光學企業，發展多年，瑞聲似乎認為過去嘅手機鏡頭不算甚麼，未來先係光學零件真正爆發嘅時代。佢哋解釋，一部超級智能手機，要將AR、AI功能極大化，需要喺5G網絡之下透過Cloud，再配以足夠軟硬件去實現，手機光學產品，絕非face ID解個鎖咁少用途。

點AI法，以小弟理解，舉個例子。有一日，你喺堆填區認識一位靚女，影完佢相之後，分析容貎數據後就可以上網搵到佢公開嘅Facebook、IG賬戶資料，先知道佢原來係千頌C。撇除上述例子可能涉及嘅私隱問題，估計未來嘅電話有能力做到呢個程度。要做到AI功能極大化，似乎高規格嘅光學零件絕不能少。

你睇舜宇17年市盈率42.6倍，瑞聲24.2倍，兩隻股點解有PE上咁大嘅分別？好明顯投資者亦認同光學零件係手機長遠發展嘅核心所在，之所以收入幾乎完全來自手機光學零件嘅舜宇，會貴到呢個程度。

晉佳

蘋果財經，關心你飯碗
http://fb.com/appledailyatm