范冰冰親弟范丞丞參加大陸節目《偶像練習生》，成為焦點，雖然范丞丞一直擺脫家姐影子，不過范冰冰卻不時喺微博為范丞丞打氣，佢近日接受大陸媒體訪問時，佢回憶起自己決定做藝人嗰陣，家姐並冇勸止，反而揭穿家姐並唔係微博啲人所講「主動熱情型寵弟狂魔」，不過丞丞以家姐為榜樣，希望可以「一定要賺到比她更多錢去給媽媽」。

范丞丞喺《偶像》節目中，朱正廷曾講過願望係想同范冰冰拍戲，當時范丞丞護姐心切，代家姐拒絕，佢喺訪問中透露之後返屋企同家姐講呢件事，豈料范冰冰竟然話：「好甚麼好！你斷絕了我和小鮮肉拍戲的機會。」

除咗家姐留意之外，范媽都關注丞丞嘅表現，通往夢想呢條路，丞丞坦言青春期時比較叛逆，十幾歲就被送去英國讀書，范媽本來希望佢可以考當地嘅音樂學院，之後丞丞愛上學籃球，范媽將丞丞轉去美國一間學校讀書，點知學咗一段時間，丞丞又再一次想放棄，喺海外求學期間，佢閒時睇唔少男團演出，起初只係單純覺得啲人幾型、啲歌幾好聽，後嚟佢直接同范媽講想做idol學跳舞、學唱歌，丞丞覺得抱歉係「永遠都在逼我媽」，讓范媽操心。

面對丞丞突然想入行，范冰冰都冇制止，只係覺得弟弟喺後生嗰陣有多啲歷練，據樂華公司老闆杜華回憶大概喺一年半之前，有一日
冰冰致電俾對方，稱胞弟想做練習生，問可唔可以去樂華練習，之後按照流程通過藝能測試、面試後，丞丞成為練習生，冰冰同范媽平時會討論丞丞，睇吓丞丞有咩可以改進，不過講講吓就會變成兩個人一齊教訓丞丞，雖然冰冰睇落幾嚴厲，但丞丞知道家姐好錫佢，以前只要冰冰去海外都會特意買啲靚衫俾丞丞。

講到冰冰有「巨星光環」，會唔會令丞丞有壓力，丞丞喺報道中覺得要換角度理解，其實家姐係一個榜樣，以後一定要超過家姐，自己反而係抱住呢個想法，肯定要努力，唔能夠丟臉。

精選娛聞，喺晒《娛果》
http://fb.com/appledailyent