土地供應專責小組揸旗嘅土地大辯論月底結束諮詢，今日一個土地論壇上，身兼鄉議局當然執委嘅律師林國昌喺台上爆seed，直指土地問題源於政府規劃「一塌糊塗」，又為新界居民抱不平，話90年凍結土地發展「規死咗」，「唔賠償又唔畀發展」，形容啲地仲喺冰格，繼而燒埋土供小組嗰疊，「搞個土地專責小組仲慘，冚唪唥（成員）坐晒係到！」

其中一個土地小組成員曾鈺成都喺現場；睇見曾鈺成躺着也中槍，論壇主持陳美齡都請本來冇份發言嘅曾鈺成講兩句，一向轉數高嘅曾鈺成梗係唔會捱打，佢話林鄭講明土供小組意見一定會落實，仲為公私營合作辯護，指好多土地都喺發展商手上，政府要同對方講數，仲乘機話：「唔知新界啲老友記手上有幾多地？似乎好多已賣晒畀發展商」。

嘩，原居民同發展商呢啲交易，好敏感㗎喎，唔知係咪因此搞到台上嘅林國昌好大反應，勁撐收地，「我（政府）使乜『蟻』你啫，你要地呀嘛，咪收咗佢先囉（引用土地收回條例），收咗你咪計數囉，起幾多公私樓，使乜同你講耶穌啫，咁先快吖嘛！」台下觀眾就拍晒手，曾鈺成就打完場，話大辯論諮詢結果若果話要收地，就會叫政府收地喎。