韓國女神全智賢孖男星李政宰同河正宇合作嘅新片《復國者聯盟》（前譯《暗殺》），將於下月22日喺韓國上映，而一眾演員今朝出席於首爾舉行嘅記者會。由於今次係全智賢自去年嘅神劇《來自星星的你》後最新作品，外界都非常關注《復國者聯盟》。

雖然今日全智賢着長褲冇晒腿，不過佢心情非常好，全程不停微笑，亦大方分享拍攝時嘅心得，表示：「同咁出名嘅導演拍戲當然有壓力，為咗演好角色，我好積極練槍，因為片中我係一名狙擊手，動作上嘅細節要非常自然。」

全智賢又笑言自己因為入戲太深，慘被其他演員稱為「狠心的女人」，不過全智賢都希望觀眾對佢嘅角色有共鳴，而表示新片可以傳達正能量。